15 min

Let's see if we are a good fit. Schedule a time to chat that works best for you

ՉՈՐՍ ՊԱՏՃԱՌ, ԹԵ ԻՆՉՈՒ
ԱՆԵԼ ՌԵԲՐԵՆԴԻՆԳ

Ինչպես հայտնի «99 ֆրանկ» գրքի հեղինակն է պնդում՝ ժամանակը չի խնայում ոչ սերը, ոչ արվեստը, ոչ մեզ: Ուրեմն ինչու՞ պիտի խնայի բրենդներին: Ժամանակ է գալիս, որ բիզնեսը կարիք է ունենում փոխելու իր «դեմքը»: Դրա համար պատճառները կարող են տարբեր լինել՝ նոր մենեջմենթ, միջազգայնացում, վատ համբավ (այս պատճառը հաճախ հանդիպում է սպասարկման ոլորտի ընկերությունների մոտ), հնացած իմիջ և այլն: Ինչ պատճառ էլ լինի, կարևոր է ստեղծել վաճառվող բրենդ, որը ձեզ նորովի կներկայացնի ու կդիրքավորի շուկայում: Ռեբրենդինգ անելիս կարևոր է հասկանալ պատճառը, որպեսզի նոր բրենդը ճիշտ ու ամուր հիմքերի վրա հիմնեք:

Ռեբրենդինգ անելու պատճառները, ինչպես նշեցինք, կարող են շատ ու տարբեր լինել: Ձեզ ենք ներկայացնում 4 հիմնական պատճառ`ռեբրենդինգ անելու համար:

Միջազգայնացում

Ինչքան էլ հաջողված լինի ձեր բիզնեսը ձեր երկրում, տվյալ դեպքում Հայաստանում, վաղ թե ուշ ցանկություն ու հնարավորություն է լինելու դուրս գալ միջազգային շուկա: Կապ չունի՝ ապրանք եք վաճառում, թե ծառայություն առաջարկում, միջազգային շուկայում մրցակցությունն անհամեմատ ավելի ուժեղ է, առաջինը լինել ցանկացողները՝ շատ: Մրցակցային «ճնշմանը» դիմանալու համար ձեր բրենդը պետք է լինի ուժեղ ու խոսի ինքն իր մասին: Միջազգային շուկա դուրս գալիս նախևառաջ կարևոր է բրենդի անունը: Ոչ այնքան հաջող անունից հրաժարվելու վառ օրինակներ են Lay’s-ը (նախկինում՝ Smiths, USA) և Twix-ը (նախկինում՝ Raider, Մեծ Բրիտանիա): Նաև կա լեզվական խնդիր՝ բառը ոչ միայն սխալ արտասանելու, այլև՝ վատ իմաստ ունենալու: Հաճախ մեր ականջին հաճելի բառը, կարող է վատ ասոցացվել ուրիշ լեզվում: Ռեբրենդինգ անելիս պետք է ուշադրություն դարձնեք ձեր բրենդի նոր անվանը, դրա նշանակությանն ու այն պատմությանը, որը «դնելու» եք անվան մեջ:

Ստատիստիկա. փոքր բիզնեսների 60% ունեն միջազգային հաճախորդներ, 72% պլանավորում է մտնել միջազգային շուկա, իսկ 96% վստահ է, որ վաղ թե ուշ ընդլայնելու է իր բիզնես-տարածաշրջանը:

ինչու անել ռեբրենդինգ

«Ժամկետնանց» իմիջ

Թրենդները գալիս ու գնում են, փոխում են ու փոխվում են: Ժամանակը չի խնայում ոչ մի բան, անգամ թրենդներին, որովհետև կյանքը միշտ առաջ է գնում: Հաղթում են նրանք, ովքեր կարողանում են ժամանակին համընթաց քայլել: Իսկ հաջորդ պատճառը, որը շատ տարածված է մոդերնիզացիան է, կամ, այլ կերպ ասած՝ հնացած իմիջից ձերբազատումը: Եթե դուք շուկայում եք արդեն 7+ տարի, հավանական է, որ ձեր իմիջը հնացել է (իհարկե եթե դուք Google-ը կամ Facebook-ը չեք): Այս պարագայում միայն ժամանակը չէ, որ կարող է «հնացնել» ձեր բրենդը: Նոր պրոդուկտները, ծառայություններն ու բիզնես-ուղղությունները նույնպես կարող են ազդել ձեր իմիջի վրա: Ինչպես նաև նոր լսարաններ գրավելու նպատակը, թիրախավորված նոր խմբեր ունենալը ևս նշանակություն ունեն: Ի վերջո, հնարավոր է, որ ձեր լոգոյի ոճը և ձևը (shape-ը, տեսքը, գույնը, ֆոնտը) պարզապես հնացել ու դուրս է եկել «մոդայից», թրենդային  ու մոդեռն չէ:

Եվ հենց սա է պատճառներից մեկը, որ շատ ցանկալի ու անգամ պարտադիր է հետևել շուկայի թրենդներին:

why rebrand from old to new

Վատ համբավ կամ շուկայում վերադիրքավորում

Բրենդի անունը կարող է տուժել մի քանի պատճառներից: Դրանցից են՝ վատ սպասարկումը, կոպիտ մոտեցումը, փնթի կամ անուշադիր աշխատանքը, ժամկետների մեջ չտեղավորվելը, անպատասխանատու մոտեցումը: Հնարավոր է նաև ձեր բրենդը տուժի մրցակիցների սև ու հարձակվողական PR-ից: Եթե ժամանակին չկարողանաք այս ամենի դեմն առնել, հետո արդեն կփրկի միայն ռեբրենդինգը: Վատ համբավ ունեցող ընկերության օրինակ է Yandex տաքսի ծառայությունը: Ընկերության հավելվածը գրեթե ոչնչով չի տարբերվում շուկայում գործող մրցակից ընկերությունների հավելվածներից: Մեկնարկային գինը ցածր է ոլորտում առաջատար համարվող gg ընկերությունից: ԲԱՅՑ… պարզվում է, որ 10-ից 7-ը կարծում են, որ Yandex-ի մատուցած ծառայությունները ցածրորակ են: Հնարավոր է՝ այսպիսի վարկանիշը վարորդների վատ սպասարկման, հայավարի մունաթի ու մեքենաների անսարք կամ կեղտոտ լինելու արդյունք է: Ինչ էլ որ լինի պատճառը, ընկերությունը կարիք ունի վերականգնելու իր անունը: Շատերս տեսնում ենք, որ Yandex-ն ընտրել է ոչ թե ռեբրենդինգը, այլև մարքեթինգը՝ մասնավորապես արտաքին գովազդը և ինֆլուենսեր մարքեթինգը, շուկայում վերադիրքավորվելու համար:

Ինչևէ, Yandex-ին մաղթում ենք հաջողություն և ցանկանում ենք հիշեցնել, որ McDonalds-ը նույնպես ժամանակին վատ համբավ է ունեցել:

inchu anel rebranding

Շուկայի կամ գաղափարախոսության փոփոխություն

Հաճախ պատահում է այնպես, որ, որպես անհատ, տարիների ընթացքում օտարանում ենք մեր ընտրած գաղափարախոսություններից, տեսակետներից, փոխվում են կյանքի ու իրավիճակների մասին մեր պատկերացումները, կարծիքները: Սա ամենևին չի նշանակում, որ մենք դավաճանում ենք ինքներս մեզ: Այսպիսի փոփոխությունները ժամանակի արդյունքն են: Որքան արագ է առաջ գնում ժամանակը, այդքան արագ է փոխվում կյանքը՝ իր հետ փոխելով արտաքին աշխարհը, տեխնոլոգիաները, մարդկանց ու այն ամենը, ինչը հենց ինքը կյանքն է:

Նույնը պատահում է նաև բրենդների հետ: Ժամանակի ընթացքում այն գաղափարը, որը դրել էինք բրենդի մեջ ի սկզբանե, «հնանում» է կամ փոխվում են մեր հայացքներն այդ գաղափարի մասին: Եթե հասկանում եք, որ ձեր բրենդն այլևս չի համապատասխանում ու չի կրում այն գաղափարը, որը դրել էիք իր մեջ, ապա ժամանակն է փոխել կամ բրենդի գործունեության ոճը՝ հարմարացնելով ձեր գաղափարախոսությանը, կամ՝ փոխել գաղափարախոսությունը:

Վերջինից բացի կարևոր է նաև ձեր շուկան: Եթե, ենթադրենք, ձեր ընկերությունը զբաղվում է վիդեո և ֆոտո նկարահանմամբ, և նկատում եք, որ ձեր գործունեության ոլորտը կամաց-կամաց «տեղափոխվում» է միայն վիդեո նկարահանման, կամ ֆոտո նկարահանման դաշտ, հնարավոր է ձեզ պետք է ռեբրենդինգ՝ ձեր գործունեությանն ավելի համապատասխան լինելու համար:

master card logo evolution

Եզրակացություն

Ժամանակը չի խնայում ոչինչ: Մնայուն են միայն արժեքները (և անգամ սա է վիճելի): Ռեբրենդինգ անելու անհրաժեշտությունը կարող է առաջանալ ինչպես տարիներ, այնպես էլ բրենդի ստեղծումից ընդամենը մի քանի ամիս հետո: Բրենդի վրա վատ ազդեցություններից հնարավորինս խուսափելու համար կարևոր է ի սկզբանե ճիշտ դիրք գրավել շուկայում, ունենալ սեփական ձեռագիրն ու լինել հետևողական՝ թե օնլայն, թե օֆֆլայն տիրույթներում: Կապ չունի՝ սպասարկման ոլորտից եք, ծառայություն եք մատուցում, թե զբաղվում եք վաճառքով, կարևոր է այն «դեմքը», որով ներկայանում եք սպառողին: Իսկ բրենդը ստեղծելիս շատ կարևոր է բրենդինգ անող ընկերության ճիշտ ընտրությունը: Սա, թերևս, հաջողված բրենդ ունենալու առաջին ու ամենակարևոր քայլն է:

FacebookLinkedInInstagramShare

Կարդալ նաև